ᒋᒋᔅᒑᔨᐦᑖᓈᐙᒋᒑ ᐙᔅ ᐋ ᐋᐱᑎᓰᑦᐊᒥᔅᒄ ᐋ ᑎᐱᔅᑳᔨᒡ᙮ chichischaayihtaanaawaachichaa waas aa aapitisiitamiskw aa tipiskaayich.

ᐋᑯᐦ ᐋ ᒌᔑᑳᔨᒡ ᓈᐹᑦ ᐊᓐ ᐊᒥᔅᒄ᙮ aakuh aa chiishikaayich naapaat an amiskw.

ᐹᔨᒀᐤ ᓈᔥᒡ ᐋ ᒥᔪᑎᐱᔅᑳᔨᒡ ᑳ ᐃᑖᔨᐦᑎᐦᒃ ᐊᒥᔅᒄ ᒑ ᓂᑑᐋᐱᑎᓰᑦ, ᐐᒡ ᐋ ᒌ ᐐ ᓂᑑᐆᔑᐦᑖᑦ᙮ paayikwaau naashch aa miyutipiskaayich kaa itaayihtihk amiskw chaa nituuaapitisiit, wiich aa chii wii nituuuushihtaat.

ᓂᔮᑣᑭᒫᑦ ᒥᔥᑎᒄᐦ ᓈᔥᒡ ᐋ ᒥᐦᒑᔅᑯᓯᔨᒡᐦ᙮ ᑖᐦᑯᐦᐅᑯᑦ ᐊᓂᔮᐦ ᒥᔥᑎᒄᐦ ᓂᐦᐋᐤ ᐊᓂᑎᐦ ᐅᓱᐦᒡ᙮ niyaatwaakimaat mishtikwh naashch aa mihchaaskusiyichh. taahkuhukut aniyaah mishtikwh nihaau anitih usuhch.

ᓂᒥᒌᐙ ᐹᐦᑖᑰ ᐊᐙᔫᐦ ᐋᑦ ᓈᔥᒡ ᐃᑣᑦ ᐋ ᐋᔑᐦᒀᑦ, ᐐᒋᐦᐄᒄ, ᐐᒋᐦᐄᒄ, ᓂᒧᐃ ᓂᒌ ᐋᐦᒌᓐ᙮ nimichiiwaa paahtaakuu awaayuuh aat naashch itwaat aa aashihkwaat, wiichihiikw, wiichihiikw, nimui nichii aahchiin.

ᓂᒧᐃ ᒫᒃ ᐅᐦᒋ ᐐᒋᐦᐄᑰ ᐊᐙᔫᐦ᙮ ᒥᓯᐙ ᐊᐙᔫᐦ ᐋ ᒌ ᓂᐹᔨᒡᐦ ᐋᑳ ᐹᐦᑖᑯᑦ ᒫᒀᒡ ᑮᑆ ᐋ ᑎᐱᔅᑳᔨᒡ᙮ nimui maak uhchi wiichihiikuu awaayuuh. misiwaa awaayuuh aa chii nipaayichh aakaa paahtaakut maakwaach kiipwaa aa tipiskaayich.

ᐊᐦᑰ ᑮᑆ ᐙᒋᐦᐄᑯᑦ ᐊᓂᔮᐦ ᒋᔖᔮᒄᐦ᙮ ᐎᔮᐱᐦᑎᒥᔨᒡᐦ ᐊᓂᔮ ᐅᓱᐃ ᓈᔥᑎᔨᒡ ᐋ ᓂᐱᑳᔨᒡ᙮ ahkuu kiipwaa waachihiikut aniyaah chishaayaakwh. wiyaapihtimiyichh aniyaa usui naashtiyich aa nipikaayich.

ᐙᓵ, ᐄᑎᑰ, ᓈᔥᑎᔨᒡ ᐙᔅ ᐆ ᓂᐱᑳᐤ ᒋᓱᐃ᙮ waasaa, iitikuu, naashtiyich waas uu nipikaau chisui.

ᒥᔮᑐᑦ ᐐ ᐊᓐ ᐊᒥᔅᒄ᙮ miyaatut wii an amiskw.

ᐊᑳ ᒫᑐᐦ, ᐄᑎᑰ ᐊᓂᔮᐦ ᒋᔖᔮᒄᐦ, ᓈᔥᑖᑆ ᐙᔅ ᒋᑭ ᒥᔻᐱᒋᐦᑖᓐ ᐊᓐ ᒋᓱᐃ ᐋ ᐱᒥᔥᑳᔨᓐ᙮ ᒥᔻᔨᐦᑦᐦ ᑎᔨᑯᒡ᙮ akaa maatuh, iitikuu aniyaah chishaayaakwh, naashtaapwaa waas chiki miywaapichihtaan an chisui aa pimishkaayin. miywaayiht-h tiyikuch.